आमा

प्रसव पीडामा छट्पटिएकी मेरी आमा
एउटा सुनौलो भविष्यको प्रतिक्षामा
हात ंपिmजाई चिच्याइरहेछिन्
तर दुष्ट जल्लादहरु, संगीन घोचिरहेछन् उनको कोमल देहमा

थियो त खाँचो केवल एक जोडी सुँडेनी हातहरुको
जसले स्वस्थ शिशु निकालिदेओस्
तर दुष्ट जल्लादहरु,
निचोरिरहेछन् मेरी आमालाई आफ्ना खुनी पञ्जाहरुले
भकुरिरहेछन् उनलाई आफ्ना रक्तरञ्जित बुटहरुले

उनी चाहन्थिन्
उनको नवजात शिशुले
हटाओस् अन्धकार सबै
बालोस् नयाँ क्रान्तिको ज्योति
र
मुक्त गरोस् लाखौँ आमाहरुलाई दासताको जञ्जीरबाट

तर दुष्ट जल्लादहरु,
चाहन्छन् त्यो नवजात शिशुको भ्रुणनै सखाप पार्न
रक्त पिपाशु हातहरुले कत्लेआम गरी
परिवर्तन र अग्रगमनलाई रोक्न
त्यसैले उनीहरु,
मेरी आमाको सुकोमल अंगमा
संगीनका तीरहरु रोपिरहेछन्
ताकि उनको गर्भ नै तुहियोस् ।